Mendilibar: "Ipuruan sentsazio onak izateko garaia da
Zaldibarkoak "partida irekia" espero du Osasunaren aurka
Jose Luis Mendilibarrek agerraldia egin du gaur eguerdian Osasunaren aurkako partidaren atarian (Ipurua, 12:00). Zaldibarkoak gorritxoen egoera ona azpimarratu du eta aitortu du "bada garaia Ipuruan sentsazio onak izatekoa".
Entrenatzaile armaginak Valladoliden lortutako garaipena ekarri du gogora: "Aurrean okerren geundenean egin genituen gauzak ondoen edo Valladolidi gehien kostatu zitzaionean. Indartu egiten gaitu, baina etxean ere hiru partida jokatu ditugu eta ez dugu bat bera ere irabazi. Joko ona lortu nahi dugu eta pozik irten zelaitik ".
Mendilibarrek "partida irekia" espero du. "Gol gutxi jasotzen dituzte, eta badirudi defendatzen baino ez direla aritzen. Baina atezaindegitik urrun defendatzen dute. Seguru daude, sendo, eta ondo egiten dute. Haien bizkarrarrera jokatzen saiatu behar dugu, kontrako zelaian denbora gehiago jokatu. Eta orduan haiek izango dira deseroso egongo direnak", esan du.
Zaldibarkoaren ustez, Osasunaren aurkako gakoetako bat "gu izatea da, lotsagabeak izatea eta 90 minututan kontzentratuta egotea. Normalean, derbiak jokaldi puntualen bidez erabakitzen dira".
"Osasuna ondo dago. Oso ondo amaitu zen aurreko denboraldia. Argi dauka zer jokatzen duen eta ondo egiten du. Gure estiloaren antzekoa da. Baina euren aurka jokatu dugunean guri gehiago kostatu zaigu nahi dugun erara jokatzea haiei baino ".
Entrenatzaile armaginak Pozo eta Bryan Gil taldeko azken bi fitxaketei buruz ere hitz egin du. "Pozok hegalean aurreran eta atzean joka dezake. Azkarra da, lotsagabea da, aurretik jokatzen badu aurkariaren bizkarra bilatu dezake. Orain arte hor arazoak genituen. Daukagunaren desberdina da "
Bryani buruz esan duenez, "Bakarkako jokaldietan trebea da, aurkariarengandik joan eta erraz gailentzen da. Une honetan ez genuen bera bezalako jokalaririk. Partida itxietan lagundu gaitzake, aurkariak gainditzeko duen erraztasunagatik".
Merkatua itxi eta gero, Mendilibarrek 25 jokalari ditu bere aginduetara. "Egunerokoa ona izatea espero dut, jende asko dagoenez gutxiago parte hartuko duten jokalariak egongo direlako".