Mendilibar: Irabazteko asmoarekin goaz, hamargarren geratu nahi dugu

José Luis Mendilibarrek, SD Eibarreko entrenatzaileak, bihar El Molinónen duten partida baino lehenagoko prentsaurrekoan, gaur, azpimarratu du bere taldea Gijónera doala «partida irabazteko asmoarekin. Oraindik ez dugu denboraldia bukatu, eta hamargarren geratu nahi dugu».
Mendilibarrek deialdiaren berri eman zuen: harrobiko Ander Gayoso izango da nobedade, eta bajan izango dira Keko Gontán, ondoez fisikoekin, atezain Jaime (lesionatuta), eta David Juncà, Lillo, Borja Ekiza eta Saúl Berjón erabaki teknikoa tarteko.
«El Molinón beteta egongo da gure aurka eta haien alde, normala den bezala. Zelai zoragarria da jokatzeko, Lehen Mailako politenetakoa, eta, gainera, beteta egongo da. Zer hobeagorik jokalarientzat horrelako giroa baino. Arriskuan jartzen dute beren bizitza, oso denboraldi ona egiten ari dira, askok etsita jo genituen, eta partida hauetara beheko mailara jaitsita iritsiko zirela uste genuen, eta hor daude, izan dituzten muga guztiekin», azpimarratu zuen.
«Espero dut gure zelairatzea ona izatea. Kanpoko azken bi partidak txarrak izan dira, batez ere lehen zatiak, eta indartsu hasi behar dugu. Erdi lo ateratzen bagara, haiek ez dute Madrilen edo Bartzelonaren kalitaterik, baina desberdinak dira, abiadura dute, ausardia eta gogoa».
Mendilibarrek nabarmendu zuen bere jokalariak «mentalizatuta» daudela partida irabazteko. «Hurrengo denboraldirako telebisten diru gehiago dugu jokoan, eta horrek pizgarri izan behar du guretzat. Baina, curriculuma ere hor dago, eta ez da gauza bera izango hemendik urte batzuetara esatea Eibar bederatzigarren edo hamargarren geratu zela edo 16. edo 17.».