Eibarrek bana berdindu du RC Deportivoren aurka
Armaginek puntu bakarra urratu dute, eta 39 punturekin dira
Eibarrek bana berdindu du RC Deportivoren etxean Ligako 27. jardunaldian, norgehiagoka gorabeheratsu batean. Eibartarrak jokalari bate gehiagorekin ibili dira bigarren zati osoan; izan ere, Koval atezainak txartel gorria ikusi du lehen zatiaren amaieran. Baina eibartarrak ez dira gai izan nagusitasuna islatzeko eta hortaz, puntu bakarra eskuratu dute Inuiren golari esker.
Edonola ere, lehia etxekoen gehiagotasunarekin hasi da. Deporrek abagune garbiak izan ditu lehen minutuetan. Hasi eta berehala, Dmitrovicek bikain gelditu dio buruz burukoa Andoneri eta hiru minutu beranduago, berriz ere geldiketa ezinhobean, Lucasen jaurtiketa kornerrera bidali du serbiarrak.
Eibarrek, ordea, zortea aldeko izan du eta hamargarren minutuan aurretik jartzea lortu du bere lehen aukera garbia. Inui ederki aprobetxatu du Orellanak eskuin hegaletik ipinitako erdiraketa eta Kovalen irteera kaxkarrari etekin aterata baloia sare barrura bidali du. Handik aurrera, Eibar nagusitzen saiatu da baloiaren bitartez. Baina Deporrek ez du amorerik eman eta bere jokoa egiten saiatu da. Gainera, 26. minutuan Orellanak, min hartuta, zelaia utzi behar izan du.
Handik gutxira Deporrek minutu onak izan ditu. Andon zutoinarekin topatu da hogeita hamargarren minutuan. Hurrengo jokaldian, aldiz, ez du hutsik egin errumaniarrak eta berdinketaren gola lortu du. Gerora, lehen zatia amaitzeko bost minutu falta zirenean, Koval atezainak txartel gorria ikusi du eta Eibar jokalari bat gehiagorekin geratu da.
Bigarren zati osoa jokatu du Eibarrek jokalari bate gehiagorekin. Gidoia ez da aldatu. Armaginak baloi jabetzaren bitartez, Depor bere zelaian sartu du. Galiziarrak kementsu ibili dira beren atea defendatzen. Eibartarrak beren gehiagotasuna islatzen saiatu dira, eta Kikeren eta Alejoren irteerekin batera, hegaletatik iristen saiatu da. Gaur, baina, zortea ez dute aldeko izan, Deporrek oso ondo sartu da atzean eta amaieran, markagailua ez da mugitu.