Armaginek 1-2 galdu dute Athletic Cluben aurka gehiago merezi izan duten partidan
Ana Junyenten neskek partida bikaina jokatu dute, baina ezin izan dute armaginen lehen derbian punturik batu
Emakumezkoen lehen taldeak 1-2 galdu du Athleticen aurka armaginen lehen euskal derbian. Ana Junyenten neskek partida bikaina jokatu dute eta gol aukera asko sortu dituzte. Hala ere, 88. minutuan Athletic Clubek sartutako gol batek punturik gabe utzi ditu armaginak.
Partida, bi taldeek sortutako gol aukerek markatu dute. Partidako 3. minutuan iritsi da Eibarren lehen aukera, baina Arolaren jaurtiketa desbideratuta joan da.
Bi minutu geroago, partidako 5. minutuan, Malena Mieresek Athleticen lehenengoa saihestu du, bisitarien penaltia gelditu ostean. Partidako 9. minutuan, M. Rodriguezen jaurtiketak langan jo du eta ezin izan du etxeko taldea markagailuan aurreratu.
Goizeko lehen gola 26. minutuan iritsi da, Ainize Bareak zuri-gorriak aurreratu dituenean. Ana Junyentenak lanean jarraitu dute eta Aidak markagailua berdintzeko aukera izan du, baina bere jaurtiketak langan jo du berriro. Atsedenaldirako 5 minutu geratzen zirenean, Arola Apariciok markagailua berdindu du M. Rodriguezen pase on baten ostean.
1-1 markagailuan amaitu da lehen zatia. Bigarren zatia ere aukera askorekin hasi da bi taldeentzat. Armaginen aukerarik argiena Aidak izan du, baina berriz ere langa aurkitu du. Armaginak lehian jarraitu dute 3 puntuak etxean geratzeko asmoz, baina 88. minutuan Athleticek 1-2koa sartu du.
Porrot gogorra armaginentzat, partida bikaina jokatu baitute.