Eibarrek emakumezkoen lehen taldeak Berriotxoaren aurka Euskadiko Kopako final laurdenetako joaneko partiduan jasandako porrotari (1-0) buelta eman beharko dio, nahiz eta ia partidu osoan zehar nagusi izan.

Eibarrek domeinatzen hasi zuen partidua eta aukerak berehala iritsi ziren. Argiena Alonsok Sarari area barruan emandako pasea izan zen, baina honek jaurtiketak atezainean jo zuen.

Eibar partiduan nagusi zen eta baloia presa barik mugitzen zuen arriskua sortuz, baina ez zituen aukerak aprobetxatzen.

Hala ere, etxekoek hartu zuten aurrea markagailuan Iratxe atezaina harritu zuen urruneko falta jaurtiketa batean.

Armaginek partidua kontrolatzen jarraitu zuten, larritu gabe. Horren ostean, jokaldi on batean, Alonsok zutoinera bidali zuen baloia.

Bigarren zatiak bide beretik jarraitu zuen. Armaginak partiduan nagusi eta etxekoak ia zelai erdia igaro gabe. Esti, Nahia eta Alonsok aukerak izan zituzten, baina zorte gabe.

Alonsok beste jaurtiketa bat bidali zuen zutoinera eta Sarak ez zuen alderatzean gola sartu. Eibar erasora etengabe joan zen, baina ez zen armaginen eguna izan eta partidua 1-0 amaitu zen.

Final laurdenetako itzulerako partidua igandean jokatuko da, 12:30etan, Unben eta Eibarrek kanporaketari buelta emateko konfiantza dauka joaneko partiduan erakutsitako nagusitasunagatik.