Euskararen Baloia proiektuak edizio berri bat itxi du irabazle batekin: Arrateko Andra Mari Ikastetxeak irabazi du lehen saria, urtez urte Eibar, Ermua eta Elgoibarko ikastetxeak futbolaren eta euskararen inguruan biltzen dituen ekimenean.

Guztira, 11 ikastetxek eta 450 haur inguruk parte hartu dute denboraldi honetan, Ipurua bisitatuz, SD Eibarren historia ezagutzeko, Euskararen Baloia ipuina deskubritzeko eta lehen taldeetako jokalariekin espazio zirraragarri bat partekatzeko. Haiekin, mezua argia izan da: kirolaren garrantzia eta bertako hizkuntza bizirik mantentzearen balioa. Bigarren saria Urkizu Ikastetxearentzat izan da.

Andra Marik Areitiora bisita bat egingo du gizonezkoen lehen taldearen entrenamendua ikusteko eta bere idoloekin oso berezia izango den topaketa bat izateko. Bigarren sailkatuak Euskararen Baloia-ren edizio esklusibo bat jasoko du.

Aurkeztutako 11 proiektuen artean, epaimahaiak sei finalista hautatu zituen azken balorazioa egin aurretik, eta bertan kontuan hartu ziren maila artistikoa, euskararen erabilera, originaltasuna, mezuaren indarra eta egindako ahalegina.

Epaimahaia 13 pertsonak osatu zuten: SD Eibar eta bere Fundazioko ordezkariak, gizonezkoen lehen taldeko entrenatzailea, Beñat San José, eta emakumezkoen taldekoa, Iñaki Goikoetxea, baita Eibarko alkatea, Jon Iraola, Hizkuntza Politikarako sailburuordea, Aitor Aldasoro, eta tokiko erakundeetako kideak, hala nola Eta Kitto eta AKEBAI.

SD Eibar Fundazioak parte hartu duten ikastetxeen inplikazio gero eta handiagoa eta jasotako lanen kalitatea nabarmendu ditu, ikastetxe guztiei zorionak emanez.