Talde-lanak puntu bat lortzeko balio izan du
Riesgok 25. minutuan ikusitako txartel gorriak neurketa baldintzatu du
Eibarrek meritu handiko puntua lortu du Mendizorrozan partiduaren heren bi jokalari bat gutxiagorekin jokatu ostean, Asier Riesgok txartel gorria ikusi eta gero.
Partiduak ez du joko handirik izan talde biek arerioa neutralizatzeko egindako esfortzuaren ondorioz, jokoa zelai erdian gauzatu delarik, baloia areetatik urrun mantenduz.
Eibarren aldetik zalantzazko hasiera izan du neurketak eta goiz iritsi da partidua baldintzatuko zuen jokaldia. 25. minutuan, Lejeunekin gaizkiulertua eduki ostean, Riesgok baloia eskuarekin ukitu du area kanpoan eta epaileak atezaina kaleratzea erabaki du.
Riesgo titular modura aritu da gaur abenduan lesioa izan ostean, baina 25 minutu bakarrik jokatu ahal izan ditu, nahiz eta bere kalitatea erakusteko denbora izan duen, 21. minutuan eskuz eskukoan Camarasari baloia atera dion moduan.
Txartel gorriaren ostean, Alavesen jokalari argiena iritsi da falta jaurtiketan. Bertan, Ibai Gomezek langara bidali du bere jaurtiketa.
Jokalari bat gutxiagorekin, Eibarrek bere jokoa hobetu du eta jokalari guztiek euren alde solidarioena erakutsi dute zelai guztian presioa mantendu eta arerioaren erasoko jokaldian itxiz.
Lehen zatiko luzapenean, Florian Lejeunek falta indartsua jaurti du, baina Pacheco adi egon da baloia kornerrera bidaltzeko.
Bigarren zatian aldaketa gutxi egon dira jokoaren patroian. Eibarrek aurreratuta jokatu du eta ez dio arriskurik sortzen utzi Alavesi.
Azken minutuetan Eibarrek jokalari bat gutxiagorekin jokatzeak sortzen duen nekea nabari izan du, Alaves armaginen atera hurbildu da eta hainbat aukera izan ditu, baina markagailua ez da mugitu eta neurketa merezitako puntu banaketarekin amaitu da.