PREBIA | Eibar irrikaz prest dago Liga Fren bueltarako

Emakumezkoen lehen taldeak bihar emango dio ongietorria 25-26 denboraldiari lehiaketa ofizialean. Taldeak aurredenboraldia amaitu zuen joan den asteburuan modu onenean: garaipenarekin eta trofeoa eskuratuta, Euskal Herria Kopako finalean Real Sociedad mendean hartuta oso emaitza motzarekin. Baina hurrengo egunean, astelehenean bertan, Iñaki Goikoetxearen taldeak dagoeneko hasi zuen ligako lehen jardunaldia prestatzen.

Eibarrek bihar hartuko du aurreko denboraldia amaitu zuen aurkaria. Baina ez da Eibar bera, ezta Sevilla FC bera ere, beraz, partida iragarrezina dirudi, momentuz. Eibarrek eta Sevillak jokatu dituzten azken lau norgehiagokek emaitza handiak izan dituzte: 3-0 eta 1-3 24-25 denboraldian, eta 3-0 eta 3-0 armaginen lehen denboraldian Liga F-n (23-24). 

Taldea ia erabat berria bada ere azken norgehiagokekin alderatuta (Ipuruan 3-0ekoan, hiru gol horietako bi Andrea Álvarezek sartu zituen, gaur egun Sevilla FCko aurrelaria denak, hain zuzen ere), talde teknikoak argi ditu ideiak, eta horietako bat azken denboraldietako planteamendua mantentzea da, nahiz eta zelaian ideia berriak ikus daitezkeen. Prentsaurrekoetan kapitainak, Carla Andrések, eta entrenatzaileak, Iñaki Goikoetxeak, aurreratu duten bezala, hori da planteamendua: joko-eredu antzekoa mantentzea, aldaketa eta hobekuntza txikiekin. Biek argi dute helburua, nahiz eta partidek eta denboraldiaren bilakaerak markatuko duten taldeak zer lor dezakeen.

Goikoetxeak filialeko jokalari batzuk izango ditu eskuragarri lehen jardunaldi honetan, aurredenboraldi guztian lehen taldearekin dinamikan egon eta gero, ligaren hasiera honetan behar puntualak asetzeko. Taldeak Opa Clementen etorrera espero du oraindik, hurrengo egunetan emango dena. 

Plantilla berritua baina gaztea izanik; anbizio handiarekin eta gogotsu, eta Ipuruko belarretara itzultzeko irrikaz (askorentzat, lehen aldiz), taldea prest dago debuta egiteko.