Nerea Gantxegi: "Ikusten ari gara lehiakorrak garela eta Iberdrola Liga ez dela ezinezkoa guretzat"

Nerea Gantxegik prentsaurrekoa eman du bihar Atletico Madrilen aurkako partidaren atarian (Unbe, 16:45). Eibartarrak adierazi duenez, "taldea oso lasai dago eta aurreko partidetan bezala aurkaria ezustean harrapatzeko gogoz".

Jokalari armaginak aitortu duenez, "Oso harrituta gaude ematen ari garen mailarekin. Pixkanaka-pixkanaka ikusten ari gara posible dela, ez dela ezinezkoa guretzat liga honetan lehiakorrak izatea".

Pasa den asteburuan, Gantxegik Primera Iberdrolan debutatu zuen estreinaldi ezin hobean. "Oso pozik nago debutagatik, baina batez ere garaipenagatik. Taldeari ekarpena egin ahal izateagatik. Eibartarra izan da Iberdrola Ligan debuta egitea oso handia da. Entrenatzaileak hamaikakoa esan zuenean emozio asko izan nituen".

Atletico Madrilen hurrengo aurkariari buruz esan duenez, "Denok dakigu denboraldi osoan goian egongo den taldea dela. Urte asko daramaten taldeak dira eta haien aurka jokatzea ametsa da guretzat".

Taldeak partidaz betetako hamar egunei egin beharko die aurre datozen bi astetan. "Lau partida gogor egokitu zaizkigu. Baina jokalari guztiekin goaz. Uste dugu aurten, inoiz baino gehiago, edonork eman dezakeela maila edozein unetan. Gure asmoa partida horiei ahalik eta ondoen aurre egitea da, ahalik eta puntu gehien lortzen saiatzea. Baina egia da 7 puntu horiekin lasaiago egingo diegula aurre bi aste hauei ", gaineratu du armaginak.