Gaizka Garitano: "Irabazteak konfiantza ematen digu egiten ari garen lanean"

Gaizka Garitanok larunbatean Leganesen aurka jokatu duten partidaren aurreko prentsaurrekoan adierazi duenez, "Burgosen garaipenak lortzeak konfiantza eta poza ematen du egiten ari zarenarekin".

Entrenatzaile armaginaren ustez, Leganes Bigarren Mailako talderik onenetakoa da eta lehen hiru jardunaldietan merezi baino puntu gutxiago lortu ditu.

Garaipena Burgosen

"Eskertzen da irabaztea. Irabazteak egiten duzun lanean sinisten laguntzen dizu . Taldeak ondo egiten du lan egunerokoan. Saioetako erritmoarekin eta jarrerarekin pozik nago. Baina prozesu luzea da gurea. Behin irabaztearekin ez da nahikoa. Bide horretik jarraitzea izango da asmoa".

Leganes

"Larunbatean partida zaila dugu aurkari handi baten aurka. Eivissaren aurka jokatu zuten partida parekatuagoa izan zen, baina beste bietan Leganes izan zen nagusi, aukera askorekin, baina golik sartu gabe. Irabaztetik oso gertu egon zen eta hiru partidetan nagusi izan da. Guk bezala, jende berri asko dauka eta oraindik taldea egiten ari da. Goiz da, baina taldea eta jokalariak ikusita, mailako talderik onenetakoa dela esango nuke".

Gakoak

Kategoria honetan bi gauza garrantzitsu daude. Bata markagailuan aurretik jartzea da, eta bestea atea hutsean uztea. Goian egon nahi baduzu, askotan atea hutsean utzi behar da. Bigarren Mailan golak sartzea ez da erraza. Taldeak oso ondo antolatuta daude, taktikoki agian Lehen Mailan baino hobeto. Gol bat sartzeak abantaila handia ematen dizu eta errazagoa egiten da abantailari eustea bi gol sartzea baino. Leganes eta gu talde indartsuak gara antolaketaren ikuspegitik. Partida oso parekatua izango da, eta xehetasun txikiekin erabakiko da.

Elkar ezagutzen

"Aurrekoan asko iritsi ginen hiru laurdenetara, eta azken paseetan ez genuen zehaztasun handirik izan. Talde berria gara erabat eta denbora pixka bat behar da elkar ezagutzeko, baloia nori eman behar diozun oinera eta nori espaziora, jokalarien arteko konbinazio desberdinak sortzeko. Hori gertatzeko denbora behar dute. Pixkanaka gertatzen ari dela uste dut, baina doitu beharra dago, batez ere azken metroetan. Nahikoa hurbilketa eta aukera egin ditugu eta gol bakarra daramagu alde. Hiru partidak ikusita, gol gehiago izan beharko genituzke".

Ipurua

"Hiru partidetatik onena Ipuruakoa izan zen. Ponferradinaren aurka jokatu genuenaren antzeko partida bat egitea da asmoa, baina emaitza guztiz ezberdina da. Edukiera %30era igotzen da, baina gainerako taldeekin desabantailan gaude. Etxetik kanpora goazenean ikusle gehiago sar ditzakete".

Fitxaketen merkatua

"Entrenatzaile bat ere ez dago pozik daukan plantillarekin, beti nahi du etorri beharko lukeen beste jokalari bat izan edo beste postu batean. Oro har, pozik nago egin dugun plantillarekin. Plantilla orekatua eta lehiakorra dugu, eta hori da, hain zuzen ere, plantilla osatzeko orduan gauzarik garrantzitsuenetako bat".