Eunate Astralaga: "Ondo gaude mental eta fisikoki, beraz emaitzak iritsiko dira"

Eibarrek ez du denboraldiko hasiera positiboena izan, lehen bi jardunaldietan porrota sufrituta. Emaitzak oso estuak izan dira bi kasuetan (gol bakarrarekin), eta markagailuak ez du islatu, hala ere, taldearen sentsazio onak. Eunate Astralagak prentsaurrekoa eskaini du denboraldi honetan Eibarrek Ipuruan jokatuko duen bigarren partidaren aurretik, non zaleen babesa ezinbestekoa izango den: "Asko gustatzen zaigu Ipuruan jokatzea, eta zaleak behar ditugu; ahal den jende gehiena etortzea espero dugu".

Lehen bi jardunaldiak ez dira oraindik esanguratsuak, nahiz eta askotan moralki garrantzitsuak izan. Baina egia da, halaber, Eibarrek ahalik eta lasterren puntuak lortzen hasi behar duela: "argi dago guk irabazi eta partida bakoitzean puntuak lortu nahi ditugula, baina egia da sentsazioak onak direla, eta bide honetan emaitzak iritsiko direla", azaldu du atezainak. Gola falta denean, "lerro guztiak landu behar ditugu, eta ditugun jokalariekin ziur laster iritsiko direla golak".

Hala ere, Astralagak azaldu duenez, Iñaki Goikoetxea entrenatzailearen mezua da "hobetu beharrekoa azpimarratzea, baina horrela jarraitzeko eta lanean jarraitzeko esaten digu", izan ere, talde osoa "mentalitate positiboarekin" dago, eta bi partida hauek ez dute "inolaz ere taldearen mentalitatean eragin".

FC Badalona Women taldeari dagokionez, atezainak argi hitz egin du: "Talde bikaina da, banaka oso jokalari onak dituena", baina "partida oso lehiatua izango da, non guk gure planarekin joango garen eta, ziur, gure aukerak izango ditugun".