Eibarrek puntuak batzen jarraitzen du 10 lehenen artean geratzeko asmoarekin

Eibarrek ordubeteko jokoan zehar salbazio matematikoa izan zuen bere eskuetan (birtuala badu jada), baina Deporren bultzadak bere saria izan zuen, eta armaginek beste puntu bat gehitzearekin konformatu behar izan zuten; puntu horrek pixka bat gehiago hurbiltzen du liga lehenen artean bukatzeko bere helburutik.
Mendilibarrenek oso piztuta hasi zuten partida, bandetatik joko bertikala eginez, eta areara iritsiz, eta ez zuten denbora asko behar izan markagailuan aurreratzeko. Izet Hajrovicek ongi jaurtitako korner batek ez zuen errematatzailerik aurkitu, baina baloia aske geratu zen, eta Adriánek errematatu zuen. Baloia sartu egin zen, beste jokalari bat ukitu ondoren.
Lehen erdia Eibarrena izan zen argi eta garbi. Eibar bere aurkaria baino gehiago aritu zen korrika eta gehiago ahalegindu zen, eta bere errenta handitzeko aukerak izan zituen, batez ere, kontraerasoan. Borjaren bi ekintza bikain izan ziren aukera argienak: gora joan zen jaurtiketa bat Kekorekin konbinatu ondoren, 25. minutuan; eta gutxigatik sartu ez zen atzerako artazi bat, 34.ean.
Deporren aldetik, hurbilketa nabarmenena Fayçalen jaurtiketa gurutzatu bat izan zen; gutxigatik joan zen kanpora, 38. minutuan.
Bigarren erdian, Depor jokoan nagusitzen hasi zen, eta Eibar bigarren gola lortzen saiatu zen, batez ere, Hajrovicek baloi geldituekin egindako jokaldiei esker; 56. minutuan, baloia eskuairara bidali zuen bere ezker leunarekin, falta baten zuzeneko sakean. Pixka bat geroago, kasik gol olinpiko bat sartu zuen.
Bigarren zatia erdiratuta, partida ero xamarra bihurtu zen, gol gehiago iragartzen zutela ziruditen etengabeko joan-etorriekin. Pixkanaka, Deporrek nagusitasuna azpimarratu eta saria jaso zuen 71. minutuan; Fede Cartabiak Asier Riesgo garaitu zuen arraseko jaurtiketa gurutzatu batekin.
Bi taldeek indarrak oso justu zituzten jada, eta partidak ez zuen askoz gehiagorako eman. Puntu-banaketarekin bukatu zen, bi taldeek izan zituzten aukeren arabera justua.